KZ RU

8 жасар қызды өлтірген күдіктіге қатысты жаңа деректер шықты

Қаратауда кішкентай қыздың өліміне күдікті ретінде ұсталған азаматтың ақыл-есі кем болуы мүмкін, деп хабарлады ktk.

 

Жамбыл облысында айуандықпен өлтірілген кішкентай қыздың ісіне қатысты тың деректер шығып жатыр. Тәртіп сақшылары бұл істі барынша құпия ұстағанымен, марқұм жеткіншектің жақындары болған жайды жасырмай жайып салды. Әрі олар Аруайды өлтірген қанішер ең ауыр жазаға кесілсін деген талап қойып отыр.


Аруайдың жақындары ауыр болса да жантүршігерлік қылмыстың қалай болғанын баяндап берді.


Аруайдың әкесі Мұхит Қаражігітовтың айтуынша, күдікті жеткіншекті өнер мектебінен үйіне алып кеткен. Онда не болғаны әзірге белгісіз. Небәрі 45 минуттан соң өлігі шығып отыр. Ал қаскөйдің мәйіт арқалаған жүрісі сол маңдағы дүкен камерасына түсіп қалған. 


- Видеоны көрдім, қызым велосипедттің артында отыр. Сосын 45 минутта қапшықты ұстап артқа қарай өткен. Мектептің алдынан күтіп алған. Қызым момын болатын. Кішкентай қызымды білемін ғой. Оған бірдеме істеген, - дейді Мұхит Қаражігітов.


Күдікті Аруайдың әкесінің шаш алдыратын тұрақты клиенті болған. Жиі келетін кісінің жүзі таныс болғасын қаршадай қыз оған ілескен. Қаскөйдің ақыл есі кем дегенге мақұмның жақындары сенбейді. Себебі қылмысын сау адамдай сауатты жасырған дейді. 


- Оның дені сау. Бәрін ойластырған. Айғақ ештеме қалмасын деп өртеп жіберген. Күртеше мен, сөмкесін де таппай отыр. 37-дегі күдікті 8 жасар қыздың киім-кешегін үйінде, мәйітін қаланың шетіне апарып от қойған, - дейді Аруайдың анасы Ләззат Семізбаева.


Сөйтіп, өзі түк болмағандай жоғалған қызды туыстарымен бірге іздепті. Ал кейін ұсталған соң қыз биіктен құлап өлді деп ақталған. Оның айтуынша, Аруай мына тауық қорадан жұмыртқа аламын деп жазым болған. Бірақ бұған ешкім сенбейді.


- Сотталып түрмеден өмір бақи шықпасын немесе ату жазасын берсін. Болмаса халықтың алдына беріп, қызымды қалай өртеді, солай өртеу керек. Не істеп қойды менің қызымды өртеп тастайтындай. Сот жабық түрде өтеді дейді, мен соттың ашық түрде өткенін қалаймын, - дейді Аруайдың анасы Ләззат Семізбаева.


Күдіктінің жары бар, баласы жоқ. Қазір бұл үйдің ауласына күзет қойылған. Себебі күдіктінің әйеліне қастандық жасалуы мүмкін деген қауіп бар. Үй иесі бет-жүзін көрсетуден қысылды.


Оның айтуынша, күйеуі 10 жылдан бері психдиспансерде тіркеуде тұр. 27 жастағы келіншек жолдасының жазықты екеніне сенбейді.


- Бес жыл отасқан адам осындайға баруы мүмкін бе, жары ретінде айтыңызшы?


- Мүмкін емес деп ойлаймын. Ештеңе айтқан жоқ, ештеңе білдірген жоқ, мен өзім таң қалып тұрмын.


Бұрын ұсақ ұрлық жасағаны үшін сотталған күдікті, екі айға қамауға алынды. Тәртіп сақшылары Аруай басына қатты тиген соққыдан өлген дейді. Оған зорлық жасалған, жасалмағанды әзірге айтылмады.


Еске салсақ, 4 күн бұрын Қаратауда жоғалған екінші сынып оқушысының өртелген өлі денесі табылған. Күдікті үш күннен кейін ұсталды. 


Пайдалы кеңес