Семей қаласында ҰБТ сынағында түлектердің бірі ешқандай ұпай жинамаған, деп хабарлайды ELnews.kz.
Бұл туралы қалалық білім бөлімінің жетекшісі Наталья Фесенко баспасөз мәслихатында мәлімдеген. Altaynews.kz хабарлауынша, 2018 жылғы ҰБТ-да Семей түлектерінің орташа көрсеткіші 84,7 балды құрады. Өткен жылғы орташа балл 82,6 болған көрінеді.
Сондай-ақ, биыл аталған қалада 182 түлек тестілеуде шекті балға қол жеткізе алмаған. Ал, бір түлектің ешқандай ұпай алмағаны белгілі болып отыр.
Енді белгіленген межеден өте алмаған, яғни қажетті балды жинай алмаған 182 түлек ЖОО-ға түсу үшін тамыз айында қайтадан емтихан тапсырады. Алайда олар гранттар конкурсына қатыспайды, тек ақылы оқуға түсе алады. Дегенмен, олардың жоғары ұпай жинаса кәсіптік білім орнына, колледждерге тегін түсуге мүмкіндігі бар.
Естеріңізге сала кетейік, алматылық түлек Шиара Құдайбергенова 25 маусымда ҰБТ тапсырып, 140 балл алды. Ол мектепте үлгерімі жоғары оқушы саналғанымен, Алтын белгіге үміткерлер қатарында болмаған.
Сондай-ақ, биыл 14 мыңнан астам түлек ҰБТ-дан өтпей қалды.
